Ruoktu

Oalle oanehis áiggis min ruovttut Laponias leat rievdan. Mii válljiimet orohagaid mat ledje čázi lahka goike, jalges dieváin. Ceggiimet ruovttu jođánit. Juohke diŋggas lea sadji ja juohke oasis goađis leai sierra namma.

Dohko gosa mii bisáneimmet guhkit áiggi leat dál stobut. Dávjá leat boares darfegoađit báhcán muhto ollu gođiid eanan lea juo váldán ruovttoluotta. Soitet dušše oidnot bovnnat mat vuosehit gos olbmot oktii leat orrun. Muhtin gođiid divvu. Ožžo ođđa goahtemuoraid ja ođđa lavnnjiid. Duorggaid láhttái ovdal go mii dolasteimmet ja vuoššaimet gáfe.

Dološ eallin lea oahpahan min bordit. Mii diehtit maid dárbbahit. Lávut geavahuvvojit ain moadde vahku juohke jagi, doppe gos bohccot leat, dehe doppe gos guolit dehe sarvvat leat. Mii soaitit ain geavahit seamme árrana dego mis lea leamaš máŋggaid buolvvaid. Mii leat oahpahan mánáide got orrut goađis, Stoahkat dolain ii oačču iige guođđit luottaid.

Mii geat leat bissun ovtta sajis ja doallan unna dállodoalu ja ealibiid lea min ruoktu maid rievdan. Giettit gos mii leat čuohppan suoinni šadde rođuid sisa, muhto mii geavahit ain seamme bivdoeatnamiid ja guolástančáziid. Muhtin bálgát jávket áiggi mielde, iežáid mii doallat rabas ja vájaldit daid mielde jagis jahkái.  

Laponias du ruoktu lea doppe gos orut, beroškeahttá man guhká orošit. Gos mii leat ruovttus lea gitta das makkár jahkeáigi lea ja gos mii dárbbahit leahkit. Gos boazu lea, dehe gos guolli lea. Doppe gos mii áigut bivdit dehe čoaggit murjjiid.

Okta sivva manne Laponia lea namuhuvvon máilmmeárbin lea danne go mii álo leat johtán dáppe. Ja danne go mii ain dahkat dan. Dan dihte mii álo leat ruovttus.