Boazu
Biekka oapmi

  • ”Vuovddit logai ahte son sávvá liehmu ja ollu čuoikkaid. Čuoikkat leat min buoremus reaŋggat.”, Per-Erik Kemi lohká, boazobargi Jiellevári vuovdečearus.
  • ”Bohccot mannet ábiide beivviid ja ijaid guohtut. Mii duvdit ravddaid, ja de čuoikkat dahket loahpa barggus.”
  • ”Mii merkejit misiid ijaid, dat lea buorebut bohccuide ja miesit čuvvot áldduid buorebut go lea gállosit.”

Jahkeduháhiid mielde boazu lea leamaš okta dain deháleamos ealibiin olbmuide Laponias. Otne boazodoallu lea ekonomalaččat dehálaš ja vuođđu sámi kultuvrii. Vaikko ealut otne leat priváhtaoamastuvvon ealibat mat dikšojuvvot jagi birra de doallá ain dat dološ sámi sátnevájas – biekka oapmi.

Boazu lea leamaš dáppe maŋemus jiekŋaáiggi rájis. Ealut leat agalaš johtimis guhton dáin vumiin ja váriin ja vuosttaš olbmot geat dáppe elle oavnnjistedje daid. Vissis báikkiide daid johtingeainnuid mielde ráhkadedje bivdorokkiid ja balde gottiid daid sisa. Bivdu attii eanet go dušše bierggu. Duoljis ja sasttis ráhkadedje biktasiid ja gápmagiid ja eará dárbbašlaš dávviriid birgema váras.

Áiggi mielde dápme gottiid. Lojes áldu geavahedje ovdamearkka dihte gottiid fillemii olbmo lusa. Muhto stuorimus ávki leai dat ahte boazu guttii ja gesii visot gálvvuid mat jođidettiin ledje dárbbašlaččat. Go álge gávppašit earáiguin mat elle sin birra leai ávkkálaš doallat ealuid. Buktagat bohccos gárte dávvirin man sáhtii vuovdit dahje lonohallat.

Boazodoallu jođihuvvo otne 51 čearuin Ruoŧas, ovcci dain leat Laponia guovllus. Čearuid miellahtut  barget ealuiguin oktasaččat birra jagi. Ođđaáigásaš teknihkka, nugo GPS sáddenrusttegat, helikopterat ja meahccevuojánat leat dávjá anus. Muhtimin, dalle go lea goavvi dahje ceavvi ja boazu ii gávnna guohtuma, sii bibmet ealuid gárddiin. Dolin, go dát vuohki ii lean vejolaš, máhtii goavvidálvi goddit olles ealu.

Sátnevájas ahte boazu lea biekka oapmi ii soaitte ollásit doallat deaivása otne, muhto bohccui ja boazodollui lea lihkakeahtes guohtuneatnamat hirbmat dehálaččat.

hostslakt_sarv_CJUtsi

Govven: Carl-Johan Utsi