Duottarboazodoallu

“Lea huššas áigi. Oađđá beivviid ja gohcá ijaid. Loahpas ii dieđe mii lea beaivi dehe idja. Johtá birra ránnjáčearuin ja iežas miessemearkumiin. Lea dálki ja biegga mii mearrida got manná. Ii leat viissis ahte bohccot leat seamme duoddaris. Lea gitta dálkkis. Ii leat viissis dat manai dán ija. De ferte geahččat birrasis. Gos bohccot leat? Ráhkadit strategiija dálkki mielde. Sáhttá dahkkot beaivvis, dehe golbma vahku maŋŋálaga.

Ja de boahtá ealuin gárdái. Dovdu dego eallin. Illodovdu go gullá ruovgamiid. Gávdnojit miesit, gávdnojit álddut ja bohccot. Manai bures dán jagi maid. Birgejedje. Lea issoras ilus go beassá vásihit dán.”

Helena Länta, Jåhkågaska tjiellde

Jagis jahkái, jahkeáiggis jahkeáigái bohccot johtet gávdnat guohtuma. Čoaskkes beivviid dálvit goivot jeahkáliid vuovddi jievja muohtagokčasa vuolde. Go geassi lahkona de ealut lihkká davás, gávdnat rásiid mat šaddet duoddariin.

Boazosámiide jahki álgá miessemánus, go miesit riegádit. Geassemánu loahpas bargu álggahuvvo čohkket bohccuid miessemearkumii. Mearkumat leat gálus ijaid vai bohccot eai gillát báhkkasis ja divrriin.

Duottarboazodoallu lea erenoamáš dan dihte go johtet guhkás sierra guohtuneatnamiid gaskkas, duoddaris vuovdái. Sierra veagat johtet sierra guhkás, ja man guhkás johtet lea gitta guohtumis. Loses dálvvit maŋŋil heajus guohtumiin de visot vurdet beaivvi liegga suotnjariid mat suddadit muohtagokčasa ja de eanan fas ihtá.

Go giđđa lahkona de álddut loktejit njuni ja ruvgalit davás. Dalle johtin fas duoddarii álggahuvvo, ruoná giettit gos bohccot fas besset guohtut ja buoidut. Jahki álgá ođđasit. Visot eallá.

Njuovvan Harrås

  • Baste čearru čohkke iežas bohccuid njuovvamii.
  • Moadde huššas beivviin čakčamánu álgogeažis visot galgá dáhpahuvvat.
  • Ođđaáigásaš fievrruiguin čohkke bohccuid mihá jođáneappot go dalle go juolggit ledje dat áidna fievrrut.
  • Eallu čohkkehuvvo álggus gárdái gos njuvvet niestebohccuid.
  • Ovdal go niestebohccot váldot gárddis geažotbealjemiesit merkejuvvot álggus. Mearkun galgá duođas dahkkot geasset muhto lea álo soames geažotbealjemiessi.
  • Dát lea maŋemus vejolašvuohta merket misiid go ii leat vejolaš dan bargat geasset go beallji ii savvo buollaša dihte.
  • Iđida maŋŋil njuovvama álgá loahppa bargu. Duljiid galgá návlet visot vejolaš seinniide, čoliid bassat ja dikšut. Duljiid galgá goikadit dehe navildit ja geavahuvvot duodjeávdnasiin.