Boaresvuovddis

Boares beahci muittaša

In riekta muitte man jagi šadden, muhto das lea goit 750 jagi. Mii leimmet ollu siepmanat dalle dan áiggi ja mus leat seammaahkásaš fuolkkit ain dán váris. Muhto párkka olggobealde leat visot jápmán. Muhtumat lea skihppán ja jápmán, nuppit fas fierran garra biekkain, muhto eatnašat lea čuolahuvvon ja šaddan fiellun, lávdin dahje várra maid, surgat juo, hivssetbáburin. Mon lean birgen bures, lean dearvvas gitta ađđama rádjái, ja mu dieđuid mielde lean mon boarráseamos dáppe.

Muhtimin buollá dáppe boaresvuovddis. Vuosttaš buollima man muittán leai jagis 1328. Muhto jagis 1413 bulii eanet. Oassi mu bárkkus bulii ja munnje báhce buollinmearkkat vulos máddagii. Dan mon divššun mu ahte šaddadan muora dan birra, ja gáhčiin. Gáhčči lea buorre mieskadeaddji guobbariid vuostá. Das maŋŋil lea dáppe buollán vihtta hávi. Munnje šaddet eanet buollinmearkkat, ja eanet gáhčči juohke gearddi ja danne mon bisun dearvvašin.

Mon in šatta nu jođánit, inge leat nu gassat, in báljo 50 cm rastá máddaga. Eatnamis dáppe lea goikkis ja guorbbas. Dat lea áhpun jus áigu šaddat boaris. Muhtin fuolkkit, mat leat gártan eanet šaddi eatnamii šaddet  stuorisin mihá jođáneabbo. Daidda njoammu mieska, dat jápmet ja šaddet orrunbáikin lottiide ja divrriide.

Teaksta: Ola Engelmark

Dárbbašlaš meahcit

Boares vuovddis gávdnojit ealibat ja šattut mat eai gávdno iežá sajiin. Oktasaš boaresvuovddit leat dárbbašlaččat ollu šaddo- ja ealibiidšlájaide. Laponias gávdno Ruoŧa stuorimus oktasaš ja olles guovllut gos vuovdi lea boaris  Dađi mielde go meahccedoallu leavvá de gártet boaresvuovddit hárvvibut ja hárvvibut. Varrasit dutkamušat leat gávnnahan ahte boaresvuovddit leat ávkin dálkkádatrievdadeami eastimii.

Lávttas eatnamiin gos leat ollu ávdnasat, ovdamearkka dihte johkagáttiin ja gorssain, šaddá guossa. Muddosis gávdno ovdamearkka dihte stuorra Guossaáhpe. Goike šattohis eatnamiin šaddá beahci buoremusat, vaikko máhttá gal gávdnat beazi jeaggegáttiin. Goahccemeahcis šaddá maid várresoahki, skáhpi ja muhton sieđgašlájat.

Goahccemeahcis lea dávjá jeagelgovččas. Dát jeahkálat leat dehálaččat bohcco dálveguohtumii. Lahppu lea heahteborramuš bohccui dakkár jagiin go lea ceavvi ja boazu ii naga goaivut eatnanrádjái. Lahppomuorat lea áiggiid mielde gádjun ollu bohccuid. Boazobargit lohket Muddosa lea ráffebáiki, guovlu gos sii dihtet bohcco álo gávdnat guohtuma.