Laponia luondolatnja

Máidnasiid báiki

Álggus suddje suhkkes boaresvuovdi muhto go boađat meahcceravdii de fáhkka eanadat rahpasa. Meahcci, eatnu, jávri ja duottar deaivvadit. Laponia luondolatnja lea guovdu buot, ii guhkkin eret Láŋasjávregáttis.

Luondolatnja lea báiki muitalusaide. Sáhttet leat muitalusat duoddara birra nuppe bealde jávrri dehe got bohccot ohcalit deike juohke giđa. Luondolanjas mii muitalit veaháš manin dát guovlu lea nammaduvvon máilmmeárbin.

Laponia luondolatnjii lea easká huksejuvvon guossástallanguovddáš mas lea kaféa ja visti man sihke arkiteavttat ja báikkálaš duojárat leat hábmen. Luondolanjas gávdnojit maid árbevieru mielde huksejuvvon goađit ja máŋggat bálgát mat mannet vistis jávrái ja Stuor Muorkke boaresvuovdái.

Loga eanet dán erenoamaš báikki birra, got luondolatnja riegádii ja got sámi hámit leat dahkkon muohtagilbbarii mii galgá čohkket dálvvi muohttaga.