Vijdes ednam, ållo gatjálvisá

Oadtjop ållo gatjálvisájt Laponia birra. Dási lip tjoahkkim ieme ja ájnnasamos gatjálvisájt ja vásstádusájt.

Arvidssona dåhpe

Gåk gávnná Arvidssona dåhpåj?

Arvidssona dåhpåj, Muddusa suoddjimpárkan, ij la mierkkidum gäjnno, valla akta vuohke dåhku vuolgget la vuobmerahtes, mij luksa manná jur Njoammelsasskama nuorttalin.

RT90 koordináhta 1688239 7431977.

Råve

Skárjá

Skárjáråvve (Mihka) Saregin la ájnna giesseråvve Laponian. Giesseråvve l dakkir råvve mav ierijt låggŋi bievllaájge maŋŋegietjen ja ruoptus giesseájge åvddåla. Skárjáråvev ruoptus låggŋi biehtsemáno gassko ja ierijt ragátmáno gassko. Goassa dav ruoptus låggŋi la tjátje ja muohttaga duogen. Válde mijájn aktavuodav ienep diedoj hárráj jali gehtja mijá häjmmabielev.

Åvdep låggŋimbiejve: 2013: 24/6. 2014: 18/6. 2015: 1/7

Miellädno

Råvve, Mielläno badjel Álggajávren, la nievrre ja iesjrádij milta dav rássti. Álggaluspen li Svieriga girkko suhkamvadnasa, maj vádtse aj oadtju suhkat.

Le gus gájka råve rasstidahte?

Le, råvijt juohkka jage gähttji. Valla dálke ja biekka máhtti dajt biejsstet, válde mijájn aktavuodav jus vigijt älvá.

Badjelánndabálges

Gåvvå: Laponiatjuottjudus

Badjelánndabálggá dåbijt tjuottjot tjieldij siebrre Badjelánnda Laponia Turism, BLT. Ienep diedo dåbij birra gávnnuji sijá häjmmabielen. Dánna li aj diedo Badjelánndabálggá birra.

Tsieggimloahpe

Tsieggimloabev kommuvnajs åtså valla diedojt tsieggimloabe birra diededa Laponiatjuottjudussaj admin@laponia.nu

Vadnasa

Dievssajávrre

Viertti Dievssajávrev rastá suhkat gå Gånågisbálggáv váttsá. Suhkamvadnasa gávnnuji, ja dåhpeguossodiddje máhttá aj suvddet jus bajeda slávgáv mij la jávrregátten. Gå Gånågisbálggá dåbijt rahpi de suhkamvadnasijt jávrregáddáj biedji ja maŋŋela gå dahppi de dajt vat ierijt válldi. Mujte, gå rastá sugá viertti agev vanás jávre goappásj bielen.

M/S Langas

Dánna gávna vanásájgijt vadnasij mij manná Gäbnátja ja Sáltoluovta gaskav.

M/S Storlule

Dánna gávna vanásájgijt vadnasij mij manná Áhkájávre rastá Rijtjemis Änonjálmmáj ja Vájsáluoktaj.

Guoddu

Luondulasj prosässa l gå muora vierri ja ájnas oasse l luonndovuogádagás. Muora ma vierri dasi báhtsi. Jus li bálggá nanna de tjuottjodiddje nåv ruvva máhttelis dajt ierijt válldá.

Girjásj

Girjátja gávnnuji gájkka Laponia suoddjimpárkaj, Sjávnja ja Stuppá birra. Dajt oattjo turisstadåjmadagájn Jåhkåmåhken ja Jielleváren/Váhtjerin ja naturum Laponian Stuor Muorken.

Låddesuoddjimbájkke

15/3-31/7 la mannambuorggo låddesuoddjimbájkijn Muddusa suoddjimpárkan. Akta bájkke l Måskosgårså allelin ja nubbe l Muddusa nuortasj bielen Muttosluobbala rádjáj. Bájkijt li galbbim ja kártan la ruoppsis sáhtso sátsadum.

Sämmi ájge l Oarjemus Stuppá tjåhkkå, Muddusin, låddesuoddjimbájkke.

Bena

Suoddjimpárkajn oadtju bednagijn mannat jus tjadnasin la, ådåjakmáno vuostasj biejves vuoratjismáno 30 bäjvváj. Gånågisbálggáv ja Rállárbálggáv Muddusin oadtju aj bednagijn vádtset. Sjávnja luonndoreserváhtan oadtju bednagav adnet valla agev tjadnasin viertti. Stubbáj, Sulidälbmáj, Ráhpaäno suorgudahkaj ja Tjuoldavuobmáj gullu álmmukriektá. Bednagav ij dárbaha bátten adnalit valla viertti agev dav gähttjat.

Benavuodjem

Ådå biejadusáj milta ij la loahpe bednagij vuodjet Laponian. Dat gullu goappátjagá jus bednagij vuodjá vuojtulasj dåjman ja priváhta anon.

Diedo sámij birra

Buoremus la aktavuodav válldet Sámedikke diehtoguovdátjijn gudi ienemus gatjálvisájt diehti vásstedit sámij ja sáme kultuvra birra. Jus e diede vásstedit de gal diehti gässta gatjádit.

Kárta

Lantmäteridja várrekárta ja Calazo kárta li ájnna kárta Laponia badjel. Dajt oastá värmmádagán, spårttåboargálijn ja muhttijn aj bensijnnastasjåvnåjn. Calazon la aj ådå kártta Muddusa suoddjimpárka ja Sjávnja badjel.

Dabbmimmerka

Miján älla suoddjimpárkkamerka tjuottjudusán, valla soajtti gávnnut turisstadåjmadagájn Jåhkåmåhken ja Jielleváren/Váhtjerin.

Muttos

Muddusij gávnnat

Lagámus gäjnno Muddusa suoddjimpárkkaj la vuodjet Skájddáj Liggábuodos, rahte E45 milta Jåhkåmåhke ja Bårjjåsa gaskan. Boadá aj lulep uvsaj baktu Sárggaváren ja Urdávren. Bievllaájge gitta Suolávrráj vuodjá Urdávre baktu. Dálven máhttá aj nuorttalis tjuojggat rahtes E45 Bårjjåsa ja Jielleváre/Váhtjera gaskan.

Muttosdåbe

Dánna li gájkka diedo Muddusa dåbij birra. Dåbijn gájkka rusta gávnnuji ja gájkka mejt dárbaj biebbmogárvvima ja bårråma diehti, rujta, bårråmnävo ja nåv vil. Gávnnuji aj ráno ja oajvevuole, valla ietjas oadádagájt dárbaj.

vne

Gávnnelissta Muddusa dåbijda.

Sállam

Rahtev Skájddáj sálli juohkka jage sjnjuktjamáno 1 biejve. Dáhpaájgen e dav sujtti ja ij la máhttelis daggu vuodjet åvddål gå gájkka muohta l suddam. Rahtijt Sárggavárráj ja Urdávrráj sálli jagev birra.

Iddjimsadje

Dánna gávna hattijt ja diedojt gåk mávsá iddjimmávsov Muddusin.

Naturum

Dánna gávna naturuma rahpamájgijt. Naturum rahpá aj juohkusijda ja skåvlåjda ájggegávdan gå ietján la dahppot. Naturumijn aktavuodav válde diŋŋgomij ja gatjálvisáj hárráj.

Dánna li aj vásstádusá ieme gatjálvisájda naturuma birra.

Ájrustit Saregin

Biejadusáj milta ij la loahpe tjátjijt Saregin mannat. Dat mierkki ålles suoddjimpárkan ij la loahpe ájrustit ja nåv vil.

Suorvvá

Oadtju Suorvá buodov vásset vaj Stuor Muorke suoddjimpárkkaj besa ja vijddábut Saregij. Lijda guoran la uksa mij agev la rahppot. Dát la industriddjabájkke ja danen iesjrádij milta sisi maná. Tjuovo rahtev buodo badjel lárkavgärddaj mij la jávre oarjásjbielen. Bálggáj ja várráj besatjit viertti Sirggá lárkavgerda tjadá mannat. Mujte uvsajt snivva dahppat dajna gå muhttijn boahttsu li gerdan.

Oasástallamfálo

Gatjálvisájt oasástallamfáloj birra rája: admin@laponia.nu