Organisasjåvnnå

Laponiatjuottjudus la väráltárbe Laponia tjuottjodiddje ja bájkkásasj organisasjåvnnå oajvvekontåvråjn Jåhkåmåhken. Laponiatjuottjudus váldij åvdåsvásstádusáv, Laponia tjuottjodime hárráj, Lenastivras Norbottenin ådåjakmáno 1 biejve 2013 ja gähttjal ådå vuogijt gávnnat väráltárbev sujttit aktan bájke ulmutjij. Väráltárbbe l ållesvuohta, gånnå ájnnasamos vuodogierge li:

  • luonndo
  • sáme kultuvrra ja boatsojäládus
  • histårjålasj árbbe.

Laponiatjuottjudus la ekonomak siebrre oajvvekontåvråjn Jåhkåmåhken.

Siebren li: 

  • Laponia tjielde/tjäro: Baste čearru, Sirges, Tuorpon, Unna tjerusj, Jåhkågaska tjiellde, Jielleváre vuovddetjiellde, Luokta-Mávas, Slakka ja Udtja
  • Jåhkåmåhke ja Jielleváre/Váhtjera kommuvna
  • Lenastivrra Norrbottena lenan
  • Luonndogáhttimdåjmadahka

Stivran li sáme åvdåstiddje ieneplåhkon ja gájkka märrádusájt tjoavddi ráde baktu aktan gájkka oassebielij.

Laponiatjuottjudus adná ietjas oahppen ja ådå vuogijt gähttjal märrádusájt bájke ulmutjij lahka doalvvot. Bájke ulmutja galggi oassálasstet ja aktisasj åvdåsvásstádusáv väráltárbes válldet. Gå biejadin ådåájggásasj tjuottjudusáv de dättodin Laponia galggá tjuottjoduvvat ållesvuohta-, nannudak- ja åvddånimvuojnujn.

Laponiatjuottjudus tjuottjot Laponiav javllamánnuj 2016 ja dan ájge árvustalli bargov. Guhkaájggásasj ulmme l Laponiatjuottjudus sjaddá stuoves dåjmadahkan.

Ájnas barggovuoge

Rádedibme

Rádedibme l ájnas doajmma tjuottjudusán. Binnemusát guokti jahkáj rádedi aktan bájke årroj ja organisasjåvnåj. Ulmme l ulmutjij vuojnojt ja máhtojt ájmujda válldet Laponia tjuottjodime hárráj.

Siebrreladnja

Tjuottjodittjat bájkev Laponia stuorrudagás la dárbbo barggovuogijs gånnå ulmutjij máhtojt ja vuojnojt gulldal. Siebrreladnjaj la sáme kultuvrra vuodon ja barggovuohke vuorroságastallamij ja oahppamij. Laponia galggá dakkir bájkke årrot gåsi gájka máhtti säbrrat; iejvvimbájkke moatte buolvvaj, kultuvrraj, giellaj ja vuojnnuj. Gå aktan barggá de nubbe nuppev gulldal ja oahppá dan milta. Siebrreladnja l aj aktisasj såbadusáj anodime duogen.

Konsensus

Laponian barggap konsensusijn, aktisasj mierredibme masi gájka guorrasi.