Daniel Olausson

Organisasjåvnnå

Laponiatjuottjudus la väráltárbe Laponia tjuottjodiddje ja bájkkásasj organisasjåvnnå oajvvekontåvråjn Jåhkåmåhken. Laponiatjuottjudus váldij åvdåsvásstádusáv, Laponia tjuottjodime hárráj, Lenastivras Norbottenin ådåjakmáno 1 biejve 2013 ja gähttjal ådå vuogijt gávnnat väráltárbev sujttit aktan bájke ulmutjij. Väráltárbbe l ållesvuohta, gånnå ájnnasamos vuodogierge li:

  • Luonndo
  • Sáme kultuvrra ja boatsojäládus
  • Histåvrålasj árbbe

Laponiatjuottjudus la ekonomak siebrre oajvvekontåvråjn Jåhkåmåhken.

Siebren li: 

  • Tjielde Laponian: Baste čearru, Sirges, Tuorpon, Unna tjerusj, Jåhkågaska tjiellde, Gällivare skogssameby, Luokta-Mávas, Slakka ja Udtja
  • Jåhkåmåhke ja Jielleváre/Váhtjera kommuvna
  • Lenastivrra Norrbottena lenan
  • Luonndogáhttimdåjmadahka

Stivran li sáme åvdåstiddje ieneplåhkon ja gájkka märrádusájt tjoavddi ráde baktu.

Laponiatjuottjudus adná ietjas oahppen ja ådå vuogijt gähttjal märrádusájt bájke ulmutjij lahka doalvvot. Bájke ulmutja galggi oassálasstet ja aktisasj åvdåsvásstádusáv väráltárbes válldet. Gå biejadin ådåájggásasj tjuottjudusáv de dättodin Laponia galggá tjuottjoduvvat ållesvuohta-, nannudak- ja åvddånimvuojnujn.

Javllamánon 2018 ráddidus mierredij guhkedit Laponiabiejadusáv gitta 31 b javllamánon 2022. Valla dat guhkesájggásasj ulmme la Laponia galggá stuoves dåjmadus årrot.