Årudahka

Buoremus várretsieggidus

Naturum Laponia guoran gávnnu mijá årudahka, guokta goade ja luovve. Åhpa mij la goahte ja gåk goaden viessu. Dánna miján li aj subtsasbåttå ja de gáhkkip.

Jådedijn la låvdagoahte mijá årudahka. Låvda ja dähkága li giehpe fievrrit ja háhppelit goadev tsieggi. Låvdagoahte aneduvvá ájn ällosujton, sierraláhkáj giesen miessemärkkomin. Uddni ålos oassti dakkir fabrijkkadagádum låvdagoadev mav tjoahkkáj biedjá ja guoddá.

Naturuma guoran gávnnu aj ienep stuoda åroj – gábmá. Gámáv tsieggijin sajijda gånnå guhkebuv årrun. Tsieggijin aj gámálágásj vuorkájt, gájttsa-, suovas- ja vanásgådijt. Uddni li gámán vinndega ja álu aj muorraguolbbe ja kamijnna. Luojdov duorggi vaj liekkas ja dimes sjaddá vellahit ja tjåhkkåhit.

Riehpen la álu rahppot, valla gå rássjot jali muohttá de bieggabielev berjas vaj goahte ij luvá. Vájku goahte ij la stuoráp gå niellja mehtera diamehterin de tjárggá fuolkke ållo mánáj ja muhtem bednaga, ja huoman ij la basske.

Javlli, goaden gånnå årru galggá agev dållå jali hilá. Goahte, gånnå dållå ij lieggi, la galmas ja gávkas.