Viessom Laponian

Ulmutja li viessum dan bájken, mij dal la Laponia väráltárbbe, maŋemus sisednamjieŋa suddama rájes. Juohkka jågån, vuomen, dieván, bávten, änon ja jávren la ietjas namma. Ulmutja, juhtusa ja sjatto li ietjasa hiebadam garra sieradusájda biekka ja suoje, bievla ja muohttaga, tjuovga ja sjievnnjeda, lieggasa ja tjoasskema hárráj. Dánna l aktelasj juoga labudime ja rievddamin. Buolvas buolvvaj la máhttudahka mannam luondos viessot váni boanndudagáv sållimis.

  • "Allávárre l munji divras. Dánna lav badjánam ja dáppelt båhti muv máddara. Uddni sijdda l ávtas. Dálven lav aktu moadda biejve åvddål aktak bijlla boahtá" Rikard Åström, Allávárre
  • ”Vuorbbedåbddo ruovggamijt gullat. Gávnnuji miese, áldo ja boahttsu. Buoragit manáj dán jage aj. Viessun. Nåv gietjedis ávvo vuojnnet.” Helena Länta, Jåhkågaska tjiellde
  • ”Dát la muv äjgádij stuorámus vaddo munji, giese Dievsan. Juo mánnán iesj galgaj gájkka bargoj bierggit, nåvti viessom danna lij.” Lena Viltok
  • ”Vuovddesábme hálijt báhkav ja tjuojkajt. Tjuojka li mijá buoremus svájnnasa ja buoremus rádna. Ja e mejdik mávse.” Per-Erik Kemi tjuojkajs viehkev oadtju boahttsujt tjoahkkitjit.
  • ”Gå áhtjen ij lim aktak bárnne de munnuv oappáv maŋŋáj hástij. Gå mánájt maŋŋáj válldá de hárjjáni. Ja måj goappátja lijkkujin bivddet. Goappátjagá oabbá ja mån.” Titti Bergman giehttu gåk la Sjávnjan årrot.
  • "Rahte ja buodo diehti Siidasjávren álkkep sjattaj alás jåhtet. Nissuna ja máná bessin boahtet. Álkkep sjattaj äloj jåhtet äno rastá ja vijddábut alás, Njunnjásij. Valla rahte ja buodo ettjin buvte dåssjå val buorijt, ednagav rahte milta vuodjegåhtin ja edna turista, guollára ja smáviellebivdde boahtegåhtin." Per Gustav Nutti, Baste tjärro.
  • "Gå lav ällobargujn badjánam de lij luondulasj munji boahttsuj barggagoahtet. Friddja valla ij huoman. Ienemus oassáj li boahttsu, dálkke ja jahkeájge muv barggovadde. Ij dal boando, valla vuorbálattjat viessu." Jessica Läntha, Jåhkågaska tjiellde