Árgga

  • ”Viertti luonnduj lijkkut jus dájna äládusájn galggá vuorbástuvvat”, Nils-Ola Parffa javllá.
  • ”Ålos má sávvi máná aj galggi álgget, mån aj. Sämmi bále árvvedav ij la javladum nåv sjaddá.”
  • ”Ällosujttára littji má garram.”
  • ”Ep la dåssjå mij gudi vierttip ådåsis oahppat, boahttsun la ietjas vájaldibme. Vájaldi gåggu li hárjjánam.”
  • ”Gidán gå tjoahkkip de háddjip suojnijt vaj älo tjåhkani. Ja de jåhttåp.”
  • Gåvvå: Carl-Johan Utsi
  • ”Muttos la buorre ednam boahttsujda, dajn alvos bákteednamijn guohtomav gávnni. Sämmi bále urudisá dánna li bisselisá, dajna l nievrre, dajna viertti viessot ja albbasij värrodit.”
  • ”Boanndás viessomav viesov, danen dájna bargav, vájku dal muhttijn vájvve ja låssåk la. Viertti barggat majna soabttsu.”
  • ”Dádjadav buorebut man ájnas la slahppo. Slahppo gádju muv ja muv boahttsujt. Slahpujn boahttsu bierggiji. Uddni e ållo ällosujttára besa slahppovuomijt vuojnnet.”
  • ”Gå guohtom nävrru ällo háddjus, ájnegasj boahttsu duok diek manni ja duonna dánna råkkåsti.”

Dájn várijn ja miehtsijn la sámeálmmuk viessum moadda tuvsán jage. Biejvve ja biekka stivrriji ulmutja viessomav. Boatsoj ietjas hekkav vaddá ulmutjijda biebmoj ja gárvoj diehti. Dánna li mijá årudagá, duobddága, histårjjå ja mijá mujto. Árranis jurra de muhtem gierge vuojnnuji. Dållåm mij la ulmutjij årromsadje oanegav. Sadje gånnå vuojŋat, lieggasav ja tjuovgav oadtju. Luondon la siello ja ulmusj la unna oasásj dassta.

Uddni sáme avtset tjieldes/tjäros Laponian viessu ja barggi. Sij tjuovudi älojt jahkeájgij milta. Vuovddesáme jåhti boahttsuj vuovdijn, ja várresáme lullevuomij ja allevárij gaskav.