Årudahka

Oanegis ájgen li mijá årudagá Laponian rievddam. Åvdebut agev jådijma. Válljijma årromsajijt tjátje lahka ja gånnå ednam lij gåjkes ja jalggat. Goadev ruvva tsieggijma. Goaden juohkka gálvon lij ietjas sadje ja juohkka goahteoasen ietjas namma.

Dálla li miján dåbe dajn sajijn gånnå guhkep årrop. Gámá álu vuojnnuji vájku muhtema juo li mårnnåm. Ihkap dåssjå goahtesadje vuoset ulmutja danna li viessum. Muhtem gådijt divudip ådå dähkágij ja de lavnnjip. Duorggip åvddål dålåv tsahkkidip ja káfav málestip.

Åvdutjis diehtep mejt gálvojt dárbahip. Ájn uddni låvdagoaden årrop muhtem vahkojt juohkka jage, gånnå ällo soajttá årrot, jali gånnå li guole jali sarva. Ihkap dållip dan árranin gånnå moadda buolva mijá åvddåla li dållim. Vuosedip mijá mánájt gåk goaden viessu. Ij oattjo dålåjn ståhkat. Viessot váni bátsidisáj guodek.

Midjij, gudi bånndura lijma ja slihturij bargajma, la årromsadje aj rievddam. Sláddjimgiette savvu, valla ájn bivddep sämmi bájkijn ja tjátjijn. Muhtem bálggá savvu, valla muhtemijt jages jahkáj vádtsep.

Laponia l duv årromsadje, oanegav jali guhkebuv. Jahkeájgge ja mijá dárbo mierredi gånnå li mijá årromsaje. Årrop dajn bájkijn gånnå l ällo jali guolle. Gånnå lip bivdátjit jali muorjjitjit.

Akta dajs årijs manen Laponia väráltárbben biejaduváj lij jur gå agev lip dággu jåhtåm. Ja ájn uddni jåhtep. Daŋgas diehti lip agev hejman.