Ällosujttár

Divras friddjavuohta

– Beras luluj iehtjádijn barggat, Elisabeth Vannar juorrula javllá. Valla, dájna dávk soabtsov, ja friddjavuodav árvvon anáv. Divras friddjavuohta.

Rájen Badjelánda ja Sarega suoddjimpárkaj gaskan la Skuollá. Sirggán li dánna gerda gånnå miesijt märkku juohkka jage sjnjilltjamánon. Vahko bájkev barggi, ja sjuohpana sajen li gájkajn soappe maj miesijt gierasti. Ij aktak oattjo suohppit. Gerdan jasska barggi ja boahttsu suojmma gärssuli.

Vájku dal nievres dálvve lij de Per Andersin ja Elisabethan li miese. Niejdan Sannan ja bárnen Antarisán li aj dakkir soappe. Ienemus älloulmutjij lunna barggá juogu de ålmåj jali nissun, ållesájgev jali binnebuv. Valla ij Elisabeth jalik Per Anders majnanik ietján gå boahttsuj barga. Elisabeth giehttu sån gähttjalij barggat sämmi bále gå boahttsuj bargaj. Mavas, ittjij maná.

– Maŋemusát ittjij ge sadjásattjan maná barggat. Ittjij hieba ällobargguj.

Äbá la vuojnnet mårålattja. Äbá ge luojo.

– Jus juojnak soabttsu de dasi fámojt biedjá. Ja måj en biednigijt gålå. Álkket viessun, javllá.

Bierggiba binnep biednigij gå mejt ládde ij lulu gåktuk dåhkkidit. Vuojána älla jur ådåsa. Muohtavuojána li oabmása ja Per Anders la danen ednagit garásjan dajt divudime.

Gå máná lijga unne ja äjgáda mähttsáj vierttijga vuolgget de siesá ja áhkko mánájt huksin, giehttu Elisabeth. Sijá dabdá ij lulu mannam. Elisabethaj viessom ednagav rievdaj. Amás viessom lij gå ällobargujn ij lim badjánam. Valla mierredij dajna barggagoahtet ja gähttjat jus manáj. Ja ajtu nåv sjattaj.

Alemus Saregin la Skuollá. Gártjes vákke várij gaskan luksa lájddiji. Giesseájge turista vádtsi dajt vákkijt gånnå älla muvrridum bálggá. Vájku älla ållo turista de máhtti vuorrádisájt dahkat, Per Andersa milta. Jur sjnjilltjamánon, gå boahttsu galggi ietjasa buojdden bårråt dálve åvddåj, de aktelasj ráfeduvvi.

Gå bájkke dálla väráltárbben la biejaduvvam de máhttá ájn gärrásin sjaddat, sierraláhkáj giesseturissmaj. Sihtaba máhttelisvuodav rasjemus bájkijn vádtsemturisma badjel mierredit.
– Dálven, basádismános vuoratjismánnuj ij mejdik dagá, javllá Per Anders. Mavas giesseájge lav vuojnnám turistajt boahttsuj jåhtemin, nåv gåk mij jåhtep, vákkij milta váttse jåhti.

Gå biejvve lieggigoahtá de l muddo älov luojttet. Gå binná miese gärddaj báhtsi de vuojnná ulmutja li låjet barggam. Várrebálltáj ienemus miese áldojt tjuovvu. De Vannara låvdagoahtáj manni båråtjit ja muhtem tijma oadátjit. Åvddål nuppev älov iehkedis gärddaj vuojedi.