Várre

Dievas viessogijs jali ållu guoros

Váre li biekka årromsadje. Alemus tjåhkåjn biekkav álu gullap. Alemus gájsijn dåssjå goasstejieŋa ja gájk sávremus viessoga li biekka rádna.

Valla mijá várijn li aj Badjelánda vijdes, ruoddnis lágo ma giessi boahttsujt alebuj guohtoma milta. Aj Sjávnja duoddara ja Sarega rådo. Hähkkat lådde hállán jus ilá lahka boadá. Dánna sjaddi tjerda ma e ietjá sajijn sjatta. Tjijkkárijn vuojnnep mijlajt ja mijlajt. Älla ållo vielggis boahttsu, valla degu giessenáste várrebáltijn jilli.

Mijá várijn li álu dålusjnamá ma subtsasti háme birra jali gåk li ávkkidum. Namma subtsas jus la jårbbåt jali rádes, gärggá jali sjaddelis. Laponia bájkkenamá subtsasti gåk mijá ednama li hábbmidum. Laponia la biejadum väráltárbben danen gå iehtjádij siegen geologak háme nåv tjielggasit vuojnnuji. Vuojnnep gåk jieŋa vákkijt li gåhpåm ja váre li badjánam.

Ulmutjijda, gudi maŋemus jiegŋaájge maŋŋela dánna viessun, gávnnujin gájklágásj ednama. Tjaktjaváre, gidáváre, giesseváre. Bátsidisá ma Laponia várijn vuojnnuji vuosedi gåk buolvas buolvvaj lip várijn bierggim. Dálven várijt guodep vuome suoje diehti.

Ájnas tsiebana
Urban Emanuelsson giehttu man ájnnasa tsiebana li várijda.

vandra_fotoLaponiatjuottjudus

Lagimvuobme

Laponian gávnnuji vijdes soahkevuome goahttsevuomij ja várij gaskan. Soahkevuomen vuorjját buollá, valla vuobme ådåsis sjaddá gå soahkemádo muhtem jagijt loabddi lastajt. Jus vuobmáj nuppádis ihti de ålles vuomev sjalliji. De vuobme rahpas ja gäddu ja giedjega ja juhtusa älláji.