Rikard Åström, Allávárre

  • Sjávnja. Gåvvå: Carl-Johan Utsi
  • Alláváren li ávtas dåbe. Giette li savvum ja årro li jåhttåm. Gåvvå: Carl-Johan Utsi
  • Rikard Åström uddni Jielleváren/Váhtjerin årru, valla suv mánnávuoda åroj la sijdan. Gåvvå: Carl-Johan Utsi
  • Gåvvå: Carl-Johan Utsi
  • Dalloj, 1950-ájge, juohkka fuolken lidjin muhtem gusá ja sávtsa, hässta ja giessesvijnne. Gåvvå: Carl-Johan Utsi
  • Gåvvå: Carl-Johan Utsi
  • Rahte buvtij ådå ájgev. Mánájt skåvlåjda rájadin ja ulmutja bargojt stuoráp bájkijn åhtsågåhtin. De suova binnun. Gåvvå: Carl-Johan Utsi
  • Dálásj ájge dajt ienemusát bassebále vuojnná. Gåvvå: Carl-Johan Utsi
  • Gåvvå: Carl-Johan Utsi

Dalloj duojna dájna barggin

Stuodaårro, várrerabdan vierttijin duojna dájna barggat bierggima diehti. Slihtura lidjin vuodon båndorviessomij, ja dajda biebmov hássat ållo vahkojt garrasit barggin. Giesen ja tjavtjan suojnneájtijt dievddin suojnij. Garra barggo lij. Dálvváj sláddjijin suojnijt änoj milta, jiekkijn ja välmmádagán.

Muorjjim, bivddem ja guollim biebmov vattij. Jávrijn ja änojn lij vallje guolijs. Muhtem ájge jagen bivddin låttijt ja sarvajt. Lånudin aj dan guovlo jåhttesámij. Ällosámijn lij boahttsubierggo ja bånndurijn bierggo, vuodja ja mielkke.

Skoahttabiedniga

Stuodaårro vierttijin åhtsåt bargojt ja sisboadojt gånnå gávnnujin. Dálvijt ålmmå timmbarijt tjuollin, ja lárkav- ja sarvesájge muhtema ällosámijt viehkedin. Bivddin gájkka degu dal oarrijt, niedijt ja sarvajt. 1960-ájge rádjáj návddebivdon lij ájnas lijgge sisboahto. Stáhta mávsij skoahttabiednigijt biernas, jiervas/gierkes, albbasis ja stálpes. Gå asstin de timbarjåhtemijn jali timbartjuoludagájn barggin.